ദോഹ: മേഖലയിലെയും അന്താരാഷ്ട്ര തലത്തിലെയും സംഘർഷങ്ങൾ അവസാനിപ്പിക്കാനുള്ള ഖത്തറിന്റെ ശ്രദ്ധേയമായ ഇടപെടലുകളെ പ്രശംസിച്ച് അമേരിക്കൻ വിദേശകാര്യ സെക്രടറി ആന്റണി ബ്ലിങ്കൻ. സംഘർഷ മേഖലയിൽ ഒറ്റപ്പെടുന്ന കുടുംബങ്ങളെ ഒന്നിപ്പിക്കുന്നതിനും ദീർഘകാല സമാധാനം സ്ഥാപിക്കുന്നതിനുമുള്ള പരിശ്രമം പ്രശംസനീയമാണ്. ഖത്തറിനെ ഞങ്ങളുടെ സുഹൃദ് രാഷ്ട്രമെന്ന് വിളിക്കുന്നതിൽ അമേരിക്ക അഭിമാനിക്കുന്നു. സമാധാന ശ്രമങ്ങളിൽ അവരോടൊപ്പം തുടർന്നും പ്രവർത്തിക്കും -ഖത്തർ ദേശീയ ദിന ആശംസ നേർന്നുകൊണ്ട് അമേരിക്കൻ വിദേശകാര്യ വിഭാഗം പുറത്തിറക്കിയ പ്രസ്താവനയിൽ ബ്ലിങ്കൻ പറഞ്ഞു.
