മനാമ: ഇന്ത്യൻ സ്കൂൾ യുവജനോത്സവമായ തരംഗിൽ 1926 പോയന്റുമായി ആര്യഭട്ട ഹൗസ് ഈ വർഷത്തെ ഓവറോൾ ചാമ്പ്യന്മാരായി. 1869 പോയന്റുമായി വിക്രം സാരാഭായ് ഹൗസ് റണ്ണേഴ്സ് അപ് സ്ഥാനം കരസ്ഥമാക്കിയപ്പോൾ 1775 പോയന്റുമായി സി.വി. രാമൻ ഹൗസ് മൂന്നാം സ്ഥാനം നേടി. 1614 പോയന്റുമായി ജെ.സി. ബോസ് ഹൗസ് നാലാം സ്ഥാനത്തെത്തി. സി.വി. രാമൻ ഹൗസിലെ 12ാം ക്ലാസ് വിദ്യാർഥിനി കൃഷ്ണ രാജീവൻ നായർ 73 പോയന്റുകൾ നേടി കലാരത്ന അവാർഡ് കരസ്ഥമാക്കി. വിവിധ തലങ്ങളിലെ മികച്ച ഗ്രൂപ് ചാമ്പ്യന്മാരെയും അവാർഡ് ദാന ചടങ്ങിൽ ആദരിച്ചു.
