ഭൂകമ്പം സംബന്ധിച്ച അറിയിപ്പുകള്‍ ഇനി ആന്‍ഡ്രോയിഡ് ഫോണുകളില്‍ ലഭിക്കും. ഇതിന് സഹായിക്കുന്ന പുതിയ ഫീച്ചര്‍ ഗൂഗിള്‍ ഇന്ത്യയില്‍ അവതരിപ്പിച്ചു. ഭൂകമ്പങ്ങള്‍ തിരിച്ചറിയാന്‍ സാധിക്കുന്ന ഒരു കുഞ്ഞന്‍ ഭൂകമ്പമാപിനിയാക്കി ഫോണിനെ മാറ്റുകയാണ് ഇതില്‍ ചെയ്യുന്നതെന്ന് ഗൂഗിള്‍ പറയുന്നു. ഫോണിന്റെ ആക്സിലറോ മീറ്റര്‍ പോലുള്ള സെന്‍സറുകള്‍ ഉപയോഗിച്ചാണ് ഗൂഗിള്‍ ഭൂമികുലുക്കം തിരിച്ചറിയുക. ഇതിന്റെ അടിസ്ഥാനത്തില്‍ അറിയിപ്പ് നല്‍കും.

ചാര്‍ജ് ചെയ്യുന്നതിന് പ്ലഗില്‍ കണക്ട് ചെയ്ത് മേശപ്പുറത്ത് വെച്ച ഒരു ഫോണിന് ഭൂകമ്പത്തിന്റെ ആദ്യ സൂചനകള്‍ തിരിച്ചറിയാനാവും. പ്രദേശത്തെ ഒന്നിലധികം ഫോണുകള്‍ സമാനമായ ചലനം തിരിച്ചറിയുന്നതോടെ ഗൂഗിള്‍ സെര്‍വറുകള്‍ അത് ഭൂകമ്പമാണെന്നും എവിടെയാണ്, എത്ര ശക്തമാണ് എന്നെല്ലാം തിരിച്ചറിയുകയും ചെയ്യും. ശേഷം ഗൂഗിള്‍ അടുത്തുള്ള ഫോണുകളിലേക്കെല്ലാം അലര്‍ട്ട് ആയി നല്‍കും.

ശക്തമായ ഭൂകമ്പങ്ങള്‍ വരുമ്പോള്‍ ഫോണിലെ ‘ഡു നോട്ട് ഡിസ്റ്റര്‍ബ്’ സംവിധാനത്തെ മറികടന്നാണ് അറിയിപ്പുകള്‍ നല്‍കുക. സ്‌ക്രീന്‍ ഓണ്‍ ആവുകയും ഉച്ചത്തില്‍ ശബ്ദം ഉണ്ടാക്കുകയും ചെയ്യും. സുരക്ഷയ്ക്കായി എന്തെല്ലാം ചെയ്യണമെന്ന നിര്‍ദേശവും അലര്‍ട്ടില്‍ ഉണ്ടാവും.
ഭൂകമ്പത്തെ തുടര്‍ന്നുള്ള പ്രകമ്പനങ്ങള്‍ ഭൂമിയ്ക്കടിയിലൂടെ സഞ്ചരിക്കുന്നതിനേക്കാള്‍ വേഗത്തില്‍, പ്രകാശ വേഗതയിലാണ് ഇന്റര്‍നെറ്റ് സിഗ്നലുകള്‍ സഞ്ചരിക്കുക. അതുകൊണ്ട് ഭൂകമ്പനം ഉണ്ടാകുന്നതിന് സെക്കന്റുകള്‍ക്ക് മുമ്പ് തന്നെ അറിയിപ്പുകള്‍ ഫോണിലെത്തും.

നാഷണല്‍ ഡിസാസ്റ്റര്‍ മാനേജ്മെന്റ് അതോറിറ്റിയുമായും നാഷണല്‍ സീസ്മോളജി സെന്ററുമായും കൂടിയാലോചിച്ചതിന് ശേഷമാണ് ഗൂഗിള്‍ ഈ ഫീച്ചര്‍ ഇന്ത്യയില്‍ അവതരിപ്പിച്ചിരിക്കുന്നത്. ആന്‍ഡ്രോയിഡ് എര്‍ത്ത് ക്വേക്ക് അലേര്‍ട്ട് സിസ്റ്റം എന്ന ഈ ഫീച്ചര്‍ ഇതിനകം വിവിധ രാജ്യങ്ങളില്‍ അവതരിപ്പിച്ചിട്ടുണ്ട്.

കൂടുതൽ വാർത്തകൾക്കും വിശേഷങ്ങൾ അറിയുന്നതിനായി മലയാളദേശം Whatsapp ഗ്രൂപ്പിൽ ജോയിൻ ചെയ്യുക https://chat.whatsapp.com/DYIe42DWaDnGyI9ObSyA1C